حاسس إني رايق النهاردة فلو حد زهقان يجي فعمل الثريد ده عن مغامرة أفريقية صغيرة عجيبة قعدت فيها أسبوعين،بما إني بحب أجرب كل حاجة وأجرب كل الشغلانات وبعشق الجزر والطبيعة يعني، لقيت شغلانةكدة واحد كان عاوز حد يشتغل معاه ف مزرعة، كان فدماغي فكرة الانعزال لفترة عن العالم يعني فتوكلت
عشان تخش ف المود يعني الحدوته في جزيرة كبير إسمها Mfangano دي موجود وسط بحيرة فيكتوريا وموجوده بين 3 دول " كينيا، أوغندا، تنزانيا" ركبت أنا أتوبيس من نيروبي -العاصمة- لمدينة Mbita الساحلية اللي مفروض بناخد منها عبارة للجزيرة وكان المفروض هقابل الراجل ده هناك يعني
خدت طبعًا أرخص أتوبيس من نيروبي مع عامة الشعب، كان من أيام الانجليز تقريبًأ في السبعينات، الموقف كحل والناس كلها لوكالز وأنا الاجنبي الوحيد الساعة 2 حاجة فيلم رعب، المهم بعد 8 ساعة فرهدة وصلت Mbita المفروض أنا كنت مقرر أنعزل بقا عن الناس شوية والستات وأتواصل مع الطبيعة وكدة😅
وصلت قابلت الراجل اللي هشتغل معاه، كان اسمه (جون أوكيلو) يعني راجل بسيط جميل طموح، المهم قالي إنت مش لوحدك يا معلم في حد كمان جاي معانا الجزيرة، اتقفلت وفنفس الوقت الفضول تملكني الصراحة، قالي دي بلجيكية وهنستقبلها كمان شوية، قلت بلجيكية بقا وفرفورة وهتفرهدنا ف الطلعة ربنا يستر.
ودي كانت أول مرة أقابل صديقتي العزيزة " شاغي" فتاة بلجيكية رقيقة الملامح جميلة المحيا شقراء الشعر بنية العينين/ شغالة مدرسة واتضح إنها بـ 100 راجل وهتبقى رفيقة الكفاح والمرمطة الأيام الجاية على الجزيرة .. وعشان نقفل أم الموضوع ده بدري " مرتبطة ياخوانا وعليا الطلاق ما عملنا حاجة😂
قعدنا في Mbita يومين تجولنا ف المدينة عقبال ما العبارة تيجي، كنا قاعدين عند قريب جون، كان باستور اسمه "دانيل" عنده عشروميت ولد والبيت صغير جدًا، كنا بنلعب ونهزر معاهم أنا وشاري .. استكشفنا المدينة والأماكن اللي حواليها
المهم جه يوم العبّارة جهزنا الشنط واشترينا شوية بقالة تساعدنا ع النجاه ف الأيام الجاية .. الرحلة بالعبارة أخدت ساعتين، منظر بحيرة فيكتوريا وهم وكل شوية نرسى عشان ناس تنزل ف جزيرة معينة، كل الناس محملة شولة وشايلين زاد عشان الرحلة بتحصل كل أسبوعين بس،شوية ولقيت أرض جزيرتنا هلت
وصلنا "مفانجانو" جزيرة بمعنى جزيرة بس عملاقة فيها حوالي 27 قرية صغيرين! كنت قاعد ف حته اسمها Nyakweri،المهم رسينا طبعًا الناس كلها مبحلقة الأجانب الوحيدين، الأطفال بيجروا ورانا، جون قالنا يلا هنمشي بتاع 4 كيلو للبيت فاللي هو احا يا جون يعني،المهم مشينا وسط الأراضي الفسيحة الخلابة
وصلنا غابة كدة بعد شقاء، اللي هو خلاص بنموت أنا وشاغي، لقيت جون بيقول البيت اهو، دي غابة يا جون، المهم لاح ف الأفق كده ف وسط الغابة مجموع مباني من الطين متفرقة بعشوائية منظمة وعرفت دلوقتي إن دي بيوت العيلة ليه ولاخواته وكدة، وإن ده هيبقى المأوى بتاعي لمدة أسبوعين!
قعدت أنا وشاغي ف واحد منهم الكوخ كله طين طين فيه سريرين بسوى الأرض، السقف كان عبارة عن الصاج المعدن اللي مع المطره اللي طول اليوم كان بيعمل مزيكا عظيمه بليل وانت نايم مع شوية فحيح تعابين كدة تعدي تمسي عليك وتكمل طريقها، مفيش ماية! الخزان اللي بره ده كنا بنجمع فيه المطرة عشان نشرب
كان فيه كشاف صغير واحد كدة بنشحنه بالطاقة الشمسية طول النهار عشان يشتغل بتاع ساعة أو اتنين بالكتير بليل غير كدة كان الليل ظلام دامس يعني وأي حاجة تلوشك سيبها تلوشك
الروتين اليومي كنا بنصحى 5 الفجر، نمشي لحد الأرض بتاعتهم، الأرض دي حرفيا عشان نوصلها كل يوم Hike لوحدها كانت بتاخد ساعة الا ربع تسلق منحدرات وتعدي من بين شجر لحد ما توصل التلة تلاقي محصول الدرة ممتد قدامك زي الدهب ف الأرض، شغلتنا كانت اننا نجمع المحصول وننزل بيه المسافة دي كلها
الموضوع كان مرهق جسمانيا بطريقة خارقة الشمس مع الشغل، زائد إن الأرض أصلًا عبارة عن منحدر مش ممتدة! فلازم تحافظ ع توازنك والا هتتزحلق تقع! واتزحلقنا كتير واتخربشنا واتعورنا وعملنا سكارز حلوه يعني، بس المنظر من فوق وانت شايف الجزيرة كلها كان وهمي كنت بحس إني ملك الكون❤️
بعد كدة نلم اللي جمعناه ف شكارة وتحاول تنزل بيه من التله - ده لو انت دكر يعني- شوية شقلباظات لحد مانرجع البيت ميتين، نبدأ مرحلة تانية وهي تفريط الدرة اللي جمعنا، طبعا الموضوع كان فشخ انك تفرط كل الكمية دي بايدك بس، بطن الإبهام عندي اتقشرت وتقريبا بصماته راحت بس اتعودنا
الأكل اللذي كان إيه بقا، كل الأيام ده كان أكلنا، البتاع الغريب العجين اللي عاليمين ده اسمه "Ugali" ده زي العيش يعني هناك ده اللي بنعمله من الدره! عشان ظروف الفقر وكدة بيعتمدوا عليه يكبس البطن ويشبع وهو كان كده فعلًا بس ملوش أي طعم، وكرنب متخرط مغلي، وورق شجر pumpkin مطحون وسردين
كنا بنتجمع كلنا للأكل، وفي حاجة لطيفة بنجيب كوز ميه وحله كدة وواحد يعدي ع الناس يصبلهم وغسلوا ايديهم، لازم نصلي قبل الأكل، مره قالولي صلي انت المرادي قلت حته كده اللهم عافنا فيمن عافيت وآمين ويلا عشان انا جعان فشخ 😂😂😂
كنا بنروح الغابة عشان نقطع خشب نولع بيه نار عشان نطبخ الأكل ع التلت حجرات الظراف دول،ومين عنده أحلى مطبخ ناو😂😂 طبعا، اكتشفنا اننا كنا جايبين معانا شوية زبده وشاغي قررت تعمل ثورة ف الغابة وتفطرنا مره pancakes وده حدث تاريخي تناقلته ال27 قرية كلاتهم
الحمام بقا ده قصة تانية خالص، كان عبارة عن حفرة متحاوطة بصاج معدن فوسط الغابة فاللامكان وبعيد عن البيت ب500م فحرفيا الحمام كان ليه ترتيبات خاصة ومعاد محدد عشان متتزنقش وانت بعيد اوي يعني، وتخيل وانت بليل والدنيا بتشتي ومزنوق وبتطلع تجري ف الغابة ف المطرة والضلمة عشان تروح الحمام
على نور الكشاف، الموضوع كان درامي بشكل عجيب، كنا انا وشاغي بليل بنور لبعض عشان نضيع الضلمة دي، بس احقاقا للحق دي تقريبًا احسن فتره دخلت فيها الحمام، وضع الـsquat ده وهمي ومريح جدًا زائد إن هدوء الغابة كان relaxing فشخ 😂😂😂
نيجي لنقطة الدش، أي بنئادم بيعوز ياخد شاور، تاني يوم جون قالي هي هات فوطه ولبس يلا بينا، فاللي هو ع فين يا جون هناخد دش! واحنا ماشيين كل شوية فرد م العيلة أو حد غريب جاي بفوطته ويمشي معانا، مشينا بتاع 4 كيلو لمدخل الجزيرة بس مكان جنبه كدة، قالي احنا بنستحمى ف بحيرة فيكتوريا!!
فاللي هو احلى مسا عليك يا جون احنا نطرطر ف منبع النيل هنا وهما يشربوا ف مصر هناك😂😂، طلع ان في مكان للاستحمام للجزيرة كلها جزء للرجالة وجزء للستات، مكنش عندي مشكلة مع كل ده، المهم رحت وياريتني مارحت قلت ع أسوء الظروف الناس لابسه ألبسة ولا حاجة! لاقيت قدامي فوق 120 أفريقي ملط
كما ولدتهم أمهم عرايا بلابيص، قلت أفريقيا يعني ع الطبيعة طبيعة مفيش كلام، كله واحد بياخد دشه وبيليف نفسه ومروق ع حاله خالص، انا وصلت كله لقيته بيبصلي عامل زي نقطة بيضا ف وسطة عتمة الليل كدة! لقيتهم بيبصولي كده مترقبين، حسيتها لحظة فارقة هل هيبقى انا الفرور الجبان اللي نازل ببوكسر
وبما إني ملك الاندماج والتأقلم فأي مكان رحت قالع البوكسر وناطط ف الميه وأكني بعمل كدة منذ نعومة أظافري فهما اللي هو بصولي باعجاب وساتغراب كدة ايه ده مطلعش موزونجو"رجل أبيض" فرفور، طبعًا عمري مكنت nude قصاد هذا الكم من البشر لكن دي أفريقيا والموضوع كان عادي فشخ وبقى روتين
وبعد متعودت عالشاور الملط الجماعي ده، حسيت إني لازم أشارك المجتمع الملط ده بمهنتي مش كمزارع بس، سألت جون عندكو عيادة هنا قالي أه قولتلو حلو وديني عليها، رحت هناك دخلت لقيت عشه كدة وقاعد فيها واحد بيكتب روشتات ولا دكتور ربيع، احلى مسا عليك يا زميلي مشعازين دكتور، قلي ايه انت دكتور
وفجأة لاقيته قفش فيا وفتح أوضه ولقيت كراسي اترصت وخبر اتبعت ف الجزيرة كلها ان في دكتور أسنان هنا! وفلحظة بقيت أخصائي في عشة Nyakweri للطواريئ وجراحات الفم واللثة😂😂 اكتشفت بقا تقريبا ان الراجل ده تعليمه وصل لرابعة طب وفرهد وهربان😂، لقيته جبلي جوانتين وفورسيبسين وقالي مشي حالك
لقيت الناس داخله عليا واللي هو اخلع يا دكتورـ والناس سنانهم بت حرام حجر، المهم ربنا كرمني وخلعت حالتين وبقوله عقملي الفورسيبسين دول يا دوك، خدهم مني وراح فتح عليهم ميه ورجعهوملي،فانا اللي هو احا يا دكتور انت بتعمل ايه! انت بتشطف ابنك بعد ما شخ! فين ديك أم الأوتوكلاف😂 بيتادين حتى
قالي يا باشا صباح الفل يعني دي أفريقيا واحنا ع جزيرة نائية الجدير بالذكر إن نسبة الإيدز ع الجزيرة 70% نتيجة ان الأفارقة ع الجزر بينطوا ع بعض بدون كوندمز فالايدز شغال ايه نار .. قلتله انت قبلتني عشان أوصلك نسبة الأيدز ل100% يبنلمره صح!! لميت اللي باقي من ضميري واستقلت بعد ساعتين😂
فاصل من الضحك والغناء ورائعة بوب مارلي No woman 😂❤️
الكنيسة الأفريقية مبهجة جدا، وكلها غنا ورقص جميل، الناس مؤمنة بشكل كبير هناك وروحية لأقصى حد، وزي ما قولت أنا لازم أندمج واتعامل كإني منهم وده حصل طبيعي مع الوقت يعني!😂😅 😂😂
ده المكان اللي كنا بناخد فيه الدش يا جماعة في بحيرة فيكتوريا.. أكيد طبعًا صورت ومفيش ناس موجودة صدقوني مش منظر لطيف إنك تشوف بتاع 120 راجل أفريقي عريان قدامك 😂😂😂
فيوم جون قالنا يلا هنعمل Hike قلتله ده ع أساس اللي كنا بنعمله الأيام اللي فاتت دي إيه بالظبط تمارين!! قالي لاء hike هنا يعني 7 ساعات عشان هنروح أوريكو بت خالته، بيت خالته ده أعلى نقطة في الجزيرة، وصلنا هناك بعد فشخ كالعادة بس المنظر كان يستاهل الصراحة ❤️
بالنسبة للموبايلات فاحنا كنا بنمشي لحد قرية جنبنا بتاع 7 كم عشان نروح لراجل هو تقريبا الوحيد اللي عنده كهربا ع الجزيرة!،نسيب عنده الموبايلات ونيجي ناخدها تاني يوم تكون اتشحنت! يعني بتاع 20 كيلو مشي عشان اشحن الموبايل فبالتالي انا حرفيا الـ1% من البطارية كنت بستخدمه بحذر
الوجه الحزين للحدوته دي إن فاتني أفراح وخطوبات أعز صحابي وصحاب عمري يعني، كنت بمشي بالليل ف الغابة واطلع تلة صغيرة عشان القط شبكة واكلمهم فيديو كول افرح معاهم، كان بيبقى موقف صعب جدًا الصراحة إنك لازم تبقى معاهم بس ده عيب السفر الوحيد إنك يا تبقى هنا يا تبقى هناك مفيهاش وسط :((
ده مدخل الجزيرة الفجر والمراكب راسيه والنهار بيشقشق وfelt ويسعد صباحكم كلكم يا شغالين فشخ بقا❤️
بعد أسبوعين حان وقت الرحيل يعني، أسبوعين من اختبار الحياة القاسية واللي هي اليومية بالنسبة لبعض الناس ف أفريقيا،مشاعر مختلطة كتير لا أنا ولا شاغي فاهمينها بس احنا كنا سعداء بالتجربة دي،قعدنا مع العيلة -عيلتنا- ليلة الرحيل، كل واحد طلع اللي ف قلبه وعمل speech صغير وعياط ودموع كتير
وخدنا صورة للذكرى اللي محدش طبعًا شايف فيها حاجة 😂كلهم ناس سمر بس انا عارفهم واحد واحد وحافظهم وحافظ طباعهم ❤️ الناس اللي حياتها بسيطة بس كان قلبها كبير جدًا يعني
بعد أسبوعين مع بعض اتمرمطنا مع بعض، وساعدنا بعض، وأقدر أقول أنقذنا حياة بعض أحيانًا، افترقت أنا وعزيزتي شارغي، بس معانا ذكريات كتيرة لأحاديث في ليالي ممطرة ف الغابة تكفينا لسنين قدام، وهو ده السبب اللي بنسافر عشانه أصلًا الناس والذكريات والخبرات والتجارب اللي بتغير فينا ❤️
وبكد يكون ختام الثريد والمغامرة دي عشان اروح اتخمد عشان ورايا امضا الصبح😂شكرًا لحسن استماعكم فـ ال3 ساعات دول عشان كنت بسترجع وبكتب من دماغي علطول مش مرتبه 😂 وإلى اللقــاء في مغامرة أخرى ❤️
حابك تسمع الحدوته دي يا صاحبي كت قبل الفترة بتاعة مومباسا اللي قابلتك فيها ❤️😅 @iSaif_
Share this Scrolly Tale with your friends.
A Scrolly Tale is a new way to read Twitter threads with a more visually immersive experience.
Discover more beautiful Scrolly Tales like this.